Yo‘qolgan yigitning murdasi bug‘doy dalasidan topildi

Gurlan tumanida bedarak yo‘qolgan 21 yashar Murodjon Boboxonovning jasadi 31 yanvar kuni bug‘doy dalasidan topildi. Shu kuni tushdan keyin mol boqib yurgan yigit murdani ko‘rib qolgan va tuman IIB xodimlariga xabar bergan, deya bildirdi «Eltuz»ga voqea guvohlaridan biri.

Uning aytishicha, bundan bir oy burun – 31 dekabr kuni tungi ziyofatdagi janjaldan keyin yo‘qolgan yigitni qidirishga Xorazm viloyati IIBning 50 dan ortiq xodimi safarbar qilingan.

«Lekin militsiya xodimlarining qo‘lidan odam kaltaklashdan boshqa narsa kelmadi. Tovoniga ayovsiz dubinka bilan urilgan yigitlardan biri yura olmay qoldi», deydi u.

Tergovga chaqirilgan guvohlardan birining «Eltuz»ga bildirishicha, qidiruv jarayonida yigitning o‘nlab ziyofatdoshlari tergov paytida ichki ishlar xodimlari tomonidan kaltaklangan, Nurli yo‘l, Oq oltin mahallasida yashovchi 20-30 nafar shaxs tuman IIBda 15 soatlab ushlab turilgan.

10 yanvar kuni Xavfsizlik kengashining selektor yig‘ilishida IIV faoliyatini qoniqarsiz deb topgan prezident Mirziyoev ularni “pogonni osib olib likillab yurgan poraxo‘r” va “cemizligidan 10 metrga ham yugura olmaydigan va o‘g‘rini quvib yetolmaydigan meshqorin IIB xodimlari”, deya atagan edi.

Jumanazar Qurolov,
«Eltuz»ning Xorazm viloyatidagi
muxbiri taxallusi