G‘allaorol shifoxonasi bosh vrachi o‘limining yangi tafsilotlari

Eltuz ilgari xabar qilganidek Jizzax viloyati G‘allaorol tumani bosh shifokori Yusuf Esirgatov Do‘stlik tuman militsiya bo‘limidagi hibsxonada ikki kun o‘tirib chiqqach, 9 oktyabr kuni vafot qilgan edi.

Voqeaning so‘nggi aniqlangan tafsilotlariga ko‘ra, bosh vrach paxta terimi kampaniyasining borishini nazorat qilish uchun Toshkentdan jo‘natilgan “vakil”ning buyrug‘iga ko‘ra hibsda bo‘lgan.

Toshkentlik amaldorning g‘azabini keltirgan fakt, G‘allaorol shifoxonasi personalining paxta terishni uddalamayotgani bo‘lgan. Belgilangan 70 kg., norma o‘rniga shifoxona xodimlari kuniga 17-20 kg paxta terishgan.

G‘allaorol tuman shifoxonasi xodimlari Jizzax viloyati Do‘stlik tumani 13-son sovxozida paxta terishgan.

Kasbi vrach-kardiolog bo‘lgan Yusuf Esirgatov, butun O‘zbekistonning minglab idoralari rahbarlari qatori, davlatga paxta terib topshirish rejasini ta'minlashi lozim edi. O‘zbekiston paxta sanoatida turli kasbdagi odamlarni paxta terimiga majburlash, misli ko‘rilmagan holat hisoblanadi.