O‘zbek tili bayramini nishonlash to‘g‘risida qonun imzolandi

10 aprel – Abdulla Qodiriy tavallud topgan kunda prezident tomonidan O‘zbekiston Respublikasining «O‘zbek tili bayrami kunini belgilash to‘g‘risida»gi qonuni imzolandi.

Qonunga ko‘ra, 21 oktyabr O‘zbek tili bayrami kuni etib belgilandi.

Qonun e'lon qilingan kundan kuchga kiradi.

Ayni paytda mamlakat poytaxtida o‘zbek tilini mensimaslik bilan bog‘liq muammolar saqlanmoqda, deydi yaqinda O‘zbekistonda bo‘lib qaytgan, Turkiyada yashayotgan Xosiyat ismli o‘zbek turg‘uni.

U qo‘ygan videoda Toshkentdagi restoranlardan birida ofitsiant va restoran egasining o‘zbek tilini bilmasligi bir qahva idishi atrofida aks etgan.

Restoran egasi tilmochlikka chaqirgan mahalliy o‘zbek ham «soboy» deb atalgan, ya'ni qahvani qog‘oz stakanda olib ketish uchun berish servisini o‘zbekchaga tarjima qilib bera olmagan.

Ilk bor O‘zbekistonda ayni muammolarga norozilik ramzi o‘laroq, 1989 yilning fevral oyida Talabalar shaharchasidagi maydonda «Til bayrami» o‘tkazilgan, o‘zbek tiliga davlat maqomi berish so‘ralgan edi.

Eltuz.com