Shoira Gulchehra Nurullaeva olamdan o‘tdi

Taniqli shoira Gulchehra Nurullaeva uzoq xastalikdan so‘ng 83 yoshida olamdan o‘tdi. 16 yanvar kuni u Toshkentdagi Do‘mbirobod qabristoniga dafn etildi.

80-yillar oxiri va 90-yillar boshida O‘zbekistonda shakllangan “Birlik” harakati faollaridan biri bo‘lgan Gulchehra Nurullaeva hukumatga muxolif qarashlari uchun Karimov davrida ta'qibga uchragan.

So‘nggi bor «Eltuz» nashri 2019 yilning oktyabrida Gulchehra Nurullaevaning o‘z faoliyati haqidagi fikrlari va she'rlarini chop qilgan edi.

«Hozirgi yoshlar oldingi davrni ko‘rishmagan. Borigayam, yo‘g‘igayam ko‘nikib ketayotgan bir avlod. Ular ko‘p narsadan mahrum. O‘z adabiyotini, o‘z tarixini o‘qishmaydi. O‘zining buyuklarini bilmaydi. Yarim manqurt avlod yaratildimi, deya katta bir shubhaga tushaman…

Nazarimda, bunga ziyolilar, birinchi navbatda, shoir, yozuvchilar aybdor. Biz qanchalik to‘g‘ri, rostgo‘y, halol bo‘lsak, Xudo bizni bandam deydi. Bu firibgar, aldamchi, yulg‘ich odamlarni Xudo, albatta, qarg‘asa kerak…»

“Eltuz” jamoasi shoira Gulchehra Nurullaevaning yaqinlari va izdoshlariga hamdardlik bildiradi.

Eltuz.com

Marhuma shoira Gulchehra Nurullaeva «Buguni bor, ertasi yo‘qlar» haqida

Shoira Gulchehra Nurullaeva bilan suhbat, 1988 yil. — Gulchehra opa, hozir qayta qurish davrida yashayapmiz. Suhbatimizni shu mavzudan boshlasak. — Men qayta qurishni o‘zim uchun yangilik deb bilmayman. Endi o‘ylasam, urush yillari qandaydir «xundori» tayyorlab, mahallamiz bolalarini tekinga davolaydigan otam, so‘nggi burdani «non»lab ortidan ergashibyurgan qiziga emas, qo‘shnining ochdan o‘layotgan bolasiga olib chiqqan onam qayta qurish odamlari ekanlar. Bir voqeani eslasam, ko‘zimga hali-hali yosh qalqadi. 1956 yil. O‘ninchini endigina bitirganman. Maktabimiz direktori Hafiz Yengalichev menga: — Seni Moskvaga, MGUga ...