O‘zbek artistlari prezident kasalligi haqidagi xabarni rad qilishdi

O‘zbekiston tarixida ilk bora Vazirlar mahkamasi mamlakat rahbarining sog‘ligi haqida chiqargan bayonot ortidan O‘zbeknavo litsenziyasi bilan faoliyat yuritayotgan artistlardan bir nechtasi Karimov soppa-sog‘ degan iddao bilan chiqdi.

Shahzoda (Zilola Musaeva) Munisa Rizaeva Shohruhxon, Halimaxon, Ulug‘bek Rahmatullaev, Jahongir Poziljonov kabi shou-biznes vakillari o‘z tasarrufidagi ma'lumotlarga tayanib O‘zbekiston Axborot agentligi bayonotini yolg‘onga chiqarishdi.

“Har-hil gap so‘zlarga ishonmanglar yurtboshimiz sog‘ salomat” deya ta'kidlagan honanda Munisa Rizaevaning gapini boshqalar ham takrorlaydi.

Teatr sohasida oliy ma'lumotga ega Halimaxonim esa O‘zbekistondagi boshqaruv tizimining monarxiya emas respublika ekanidan bexabarligini bildirib qo‘ygan.

Halimxonim O‘zbekiston prezidentini podshox deya atagan va uning salomatligiga shubha bildirganlarning go‘riga g‘isht qalagan.

Shou-biznes vakillariga “Karimov kasal emas” degan aktsiyani o‘tkazishga O‘zbeknavo estrada birlashmasi buyruq bergani haqida ma'lumotimiz yo‘q.

Yakshanba kuni tarqatilgan O‘zbekiston Axborot agentligi yoyinlagan rasmiy bayonotda aytilishicha, Islom Karimov “statsionar davolanishda” qolmoqda.

O‘zbekiston Vazirlar mahkamasi tarafidan tayyorlangan bayonotda “Mutahassislar fikriga ko‘ra, to‘la tibbiy ko‘rik va muolaja uchun talay vaqt lozim” deyiladi.

Islom Karimov 1989 yilda Kreml tarafidan O‘zbekiston Kompartiyasiga birinchi kotib qilib tayinlanganidan beri O‘zbekistonni boshqarib keladi
Karimov davrida O‘zbekiston so‘z erkinligi bo‘g‘ilgan, inson huquqlari toptalgan va muholifat qatag‘on qilingan repressiv mamlakat sifatida tanildi.

Eltuz.com