Ulug‘bek Ashur o‘qituvchi qullar haqida qo‘shiq aytdi

Kanadada yashovchi Ulug‘bek Ashur shu bugungi kunda turli qora ishlarga majburlanayotgan o‘qituvchilarga atab yangi qo‘shiq kuyladi. «Eltuz» nashri studiyasi qo‘shiq asosida klip yaratdi. Qo‘shiqda shu kecha-kunduzda bo‘layotgan real voqealar kuyga solinadi.

Samarqand hokimi talabi bilan prezident kelishi oldidan yo‘lni tozalashga olib chiqilgan samarqandlik 23 yoshli Diana 14 mart kuni «KamAZ» mashinasi tagida qolib halok bo‘lgani haqida «Eltuz» yozgan edi.

Andijon shahri hokimi Dilmurod Rahmatullaev esa o‘tgan mavsumda yetarli miqdorda paxta termagan o‘qituvchilarni «shoqollar» deya so‘kkan.

2017 yilning sentyabrida Sayxunobod tumani hokimi Nosirjon Egamberdiev mustaqillik bayramiga o‘qituvchilarni olib chiqmagan o‘nlab maktab direktorini do‘pposlagani videosi tarqalgandi.

Prezident Mirziyoev o‘tgan yilgi yig‘ilishlardan birida «Hokim prezident vakili, hokimni muhokama qilishga hech kimning haqi yo‘q!» degan edi.

«O‘qituvchi qulga aylandi» Ulug‘bek Ashurning siyosiy mavzudagi ikkinchi qo‘shig‘idir. «Shavkat aka» deb nomlangan oldingi qo‘shig‘ida u prezident Mirziyoevni achchiq hajv qilgan edi.

«Eltuz» nashri studiyasi ushbu qo‘shiq va saytning karikaturachi rassomlari asarlari asosida tayyorlagan navbatdagi klipni e'tiboringizga taqdim etadi.

Eltuz.com