Asosiy mavzular
27 yanvar 2020

Chiroqchida IIBning gumonlanuvchini o‘ldirgan 5 xodimi qamaldi

Qashqadaryo viloyati Chiroqchi tumani IIB qidiruv bo‘limining besh nafar xodimi gumonlanuvchini so‘roq paytida urib o‘ldirib qo‘yganlikda ayblanib hibsga olindi.

«Eltuz» tasarrufidagi tergovgacha surishtiruv hujjatlarida yozilishicha, joriy yilning 23 yanvar tungi soat birlarda 32 yashar gumonlanuvchi Yusuf Abdurahmonov IIB binosida o‘lgan. 

Hujjatlarga ko‘ra, Langar qishlog‘ida mol o‘g‘irligida gumonlanib hibsga olingan Abdurahmonovning jasadi Chiroqchi tumani IIB JQ guruhi tezkor vakili, 30 yoshli katta leytenent Bekzod Ochilovning 3- qavatdagi kabinetida topilgan.

Gumonlanuvchi o‘limi yuzasidan Qashqadaryo prokuraturasi tekshiruv boshladi. Kuzatuv kamerasi tasvirlari o‘rganilmoqda. Bu o‘lim bilan bog‘liq jinoyat ishi figuranti sifatida Chiroqchi tumani IIBning besh nafar xodimi qamoqqa olingan.

Abdurahmonovning jasadi viloyat prokuraturasi xodimlari tomonidan ko‘zdan kechirildi. «Eltuz»da mavjud bo‘lgan hujjatda yozilishicha, marhumning chap ko‘zi, chap yelkasi, chap bilagi va ikkala qo‘li yuza qismida shafqatsiz qiynoq alomatlari mavjud.

“Aybiga iqror” qilishning o‘zbekcha modeli

Langar MFY To‘laqul qishlog‘ida 2019 yilning yozida beshta ho‘kizni kim o‘g‘irlaganini aniqlash maqsadida shu tumandagi o‘nlab turg‘unlar olti oy davomida IIB binosiga olib kelinib, so‘roq qilinavergan. 

Shunday gumonlanuvchilardan biri (hozirda marhum) Yusuf Abdurahmonov 2020 yilning 22 yanvar kuni kechqurun soat to‘qqizlarda qo‘liga kishan solingan holda tuman IIB ma'muriy binosiga olib kirilgan. 

Kuzatuv kameralarida Abdurahmonov katta leytenant Ochilov yetovida binoga olib kirilgani aks etgan. 

Hujjatlarga ko‘ra, Ochilov gumonlanuvchi Abdurahmonovni bino uchinchi qavatidagi o‘z xonasiga kirgizib, mayor, 31 yashar Nurbek Ovlaev va IIB JQ guruhi tezkor vakili, 35 yashar kapitan Anvar Jonqobilov qo‘liga topshirgan.

Hujjatlarda katta leytenent Ochilovning chiqib ketgani aytiladi (ammo kuzatuv kamerasi tasvirlarida buning aniq dalili yo‘q).

Tergovgacha surishtiruv bayonnomasida yozilishicha, 22 yanvar 23.30da mayor Ovlaev va kapitan Jonqobilov gumonlanuvchi Abdurahmonovning sog‘lig‘i so‘roq paytida birdan yomonlashganini IIB FMB boshlig‘i birinchi o‘rinbosari Mengnorovga bildirishadi. Chaqirilgan shifokorlar tomonidan Abdurahmonovning o‘limi qayd qilinadi. 

23 yanvar kungi ma'lumotnomada yozilishicha, “marhumni so‘roq paytida urib qiynab o‘ldirgan Ovlaev va Jonqobilov noma'lum tomonga qochib ketib qolishgan”. Ma'lumotda Ovlaev va Jonqobilov qidiruvga berilganini yoziladi. «Eltuz»ga 27 yanvar kuni ma'lum bo‘lishicha, mayor Ovlaev va kapitan Jonqobilov doxil IIBning yana uchta xodimi qo‘lga olingan.

Qashqadaryo prokuraturasi ushbu jinoyatni o‘rganmoqda.

Mazkur hodisa yuzasidan O‘zbekiston Jinoyat kodeksining 206-moddasi (hokimiyat yoki mansab vakolati doirasidan chetga chiqish) bo‘yicha jinoyat ishi ochilgan.

Bundan oldin, 2013 yilda Yakkabog‘ tumani Chordara qishlog‘ida yashovchi 32 yoshli Husniddin Oqqo‘ziev Chiroqchi tumani ichki ishlar bo‘limi xodimlari tomonidan qiynoqqa solinishi oqibatida o‘lgan edi.

Eltuz.com

Tag‘in o‘qing
24 may 2021
Litva Bosh prokuraturasi Ryanair aviakompaniyasining Afinadan Vilnyusga parvoz qilayotgan uchog‘i minalashtirilgani iddaosi bilan Minskda majburan qo‘ndirilishi va yo‘lovchilarga nisbatan ...
21 sentyabr 2016
Toshkent markazida turaman, balkondan oliy majlis ko‘rinadi, sal narida prokuratura. Ammo shuncha yildan beri dom oldidagi bir uyum chiqindi ...
26 avgust 2016
O‘z tomorqasida meva sabzavot yetishtirgan dehqonlarning hosilini erkin sotishiga ruxsat berilmayotgani, ularga militsiya va kuchishlatar idoralari orqali bosimlar ko‘rsatilayotgani ...
23 fevral 2020
O‘zbekiston Bandlik va mehnat munosabatlari vazirligi 2019 yilgi paxta yig‘im-terimi davrida majburiy mehnatdan foydalanishga yo‘l qo‘yganligi tufayli ma'muriy javobgarlikka ...
Bloglar
26 noyabr 2022
Nukusdagi voqealarni o‘rganish bo‘yicha parlament komissiyasi taklifi va Qoraqalpog‘iston Jo‘qorg‘i Kengesi iltimosnomasiga ko‘ra, namoyishlarda qatnashib ...
3 noyabr 2022
1906 yilning 3 noyabrida Germaniyaning Berlin shahrida o‘tgan Xalqaro radiotelegrafiya anjumanida SOS signali halokatni bildiruvchi ...
1 noyabr 2022
Ulug‘ o‘zbek shoiri va muholifat lideri Muhammad Solih bilan suhbatning 11-qismi Turk birligi g‘oyasi va ...