Ўғлининг ўлдирилишидан арз қилган аёл судланди

19 июн куни кечқурун президентга шикояти юзасидан Тошкентга, Ички ишлар вазирлигидаги қабулга кетаётганида Сурхандарёлик Каромат Қодирова йулда ушланиб орқага қайтарилди.

Дарбанд постида ушланган аёлнинг Сурхондарёга олиб кетилгани ҳақида 20 июн куни мустақил журналист Малохат Эшонқулова хабар тарқатди.

Унга кўра, Каромат Қодирова Жиноят ишлари бўйича Жарқўрғон туман суди биносига келтирилган.

Соат тунги 22.00-23.00 ларда суд бўлиб ўтган.

Суд идорасидан милициянинг махсус машинасида олиб чиқилган Каромат Қодирова 19 -дан 20 га ўтар кечаси Термиз шаҳрига олиб кетилган.

Ҳозирга қадар, аёлнинг устидан бўлиб ўтган суд қандай қарор чиқаргани, уни нимада айблашгани номаълум.

Можаро тадбиркор ўғилнинг ўлдирилиши билан боғлиқ

Каромат Қодирова, ўғли Муродилла Омоновнинг 2017 йилнинг 20 январида Жарқўрғон ИИБ биносида ўлдирилган дея ҳисоблайди.

«Фарзандимни милиция ходимлари милицияга олиб кириб кетиб, ярим соатда ўлдириб, жасадини моргга олиб бориб, нимталаб-нимталаб кесиб ташлаб, менинг олдимга эрталаб саҳарда олиб келиб ташлашди» дейди Қодирова ўзининг президентга видеомурожаатида.

Бироқ, вилоят расмийлари аёлнинг ўғли ўлдирилганини инкор этиб келади. Жумладан Суд экспертизасининг “Марҳум Муродилла Амонов ўзини ўзи осиб ўлдирган” деган ҳулосалари мавжуд.

Сурхондарё вилоят ИИБ собиқ бошлиғи Атаев Жасурбек эса, унинг юрак ҳуружидан ўлганини иддао қилади.

Муродилла Омоновнинг ушланишига расмий айблов, унинг автомобилда йўл ҳаракати қоидасини бузгани бўлгани қайд этилган.

Бироқ марҳумнинг онаси Каромат Қодирова, ўғлига қасд қилинишида Бозор ҳудудидаги унга тегишли 10 сотих ер сабаб бўлган дея иддао қилади.

Бозорқум Абдуллабой Раҳмонов ундан ерини сотишни сўраган, у эса буни рад қилган.

«Жарқўрғон туман ҳокими бўлган Усмон Туробов ва деҳқон бозори бозорқўми Абдулла Раҳмоновнинг буюртмаси асосида фарзандимни ўлдиришди», дейди аёл:

Ўғлининг ўлими сабабларини ҳар томонлама суриштиришни талаб қилиб, Каромат Кодирова президент қабулхонасига шикоят қилган ва уни 22 июн соат 10.00 да Ички ишлар вазирлигидаги қабулга чақиришган эди.

Eltuz.com