Кўзқараш
10 октябр 2016

Ислом Каримов очиқчасига Амир Темурга тенглаштирилди

Ёдномаларни шоир ва ёзувчилар битсин экан. Чунки уларнинг тафаккур доираси бошқаларникидан кўра кенгроқ бўлади.

Шу кунларда марҳум президент Ислом Каримовнинг вафотига қирқ кун тўлиши муносабати билан Ўзбекистон матбуоти ана шундай ёдномалар билан тўлиб-тошди.

«Ўзбекистон адабиёти ва санъати» газетаси (07.10) ҳам бу ҳайбаракаллачиликдан ортда қолмасликка эмас, балки байроқдор бўлишга қарор қилди. Газета мамлакат Ёзувчилар уюшмаси раиси Муҳаммад Али тили билан марҳум президентни соҳибқирон Амир Темурга тенглаштириб қўя қолди.

Тўғри, Ислом Каримовни Амир Темурга муқояса қилиш ҳаракати унинг ҳаётлиги даврида ҳам кузатиларди. Лекин бу тенглаштириш гап орасида қистириб ўтиларди. Муҳаммад Али каби ҳали ҳеч ким алоҳида мақола бағишлаб, бу каби очиқ ёзмаганди.

У Ислом Каримовни Амир Темурга қиёслаш учун етарли асослар борлигини даъво қилар экан: «Амир Темур арслон юракли, қўрқмас, ёвқур эди, бу сифатни Ислом Каримовга нисбатан ҳам айта оламиз», дейди.

«Довюрак» Каримов ўз қароргоҳида борадиган йўлларга туташ кўчаларни бутунлай ёптириб ташлаганда, бир жойга борса, халқ билан очиқчасига тиллашиш ўрнига алоҳида танланган кишилар билан хўжакўрсинга мулоқотлар қилганда кимлардан чўчигани, Темурбекдек ёвқурлиги қаерда қолгани ҳақида, табиийки, бир оғиз ҳам эслатилмайди.

«Ҳар иккиси ҳам адолат маёғини маҳкам тутди. Амир Темур «Куч – адолатда!» деган шиорни кўтариб чиққан бўлса, Ислом Каримов бу улуғ ҳикмат мазмунини маънавий жиҳатдан бойитиб, «Куч – билим ва тафаккурда!» дея унга юксак баҳо берди. Бежиз эмас, ҳар икки буюк сиймо ҳам «Юрт адолатсиз тура олмайди», деган сўзларни яхши кўришар, ҳамиша унга амал қилишарди», дея давом этади Муҳаммад Али.

Ислом Каримов адолати қандай эканини бугун қамоқхоналарда бегуноҳ ётган балки минглаб маҳкумлар билади. Халқнинг билим ва тафаккури юксалиб, куч бўлишидан чўчибми, ўқитувчилари у ёқда турсин, ҳатто мактаб ўқувчиларигача пахта даласига ҳайдалган, таълим сифати тобора пасайиб бораётган ўзбек юрти билади.

Муаллиф ҳар икки давлат раҳбари ҳам бемисл бунёдкор бўлгани, уларнинг бу борадаги ишлари бугун «жаҳонни ҳайратга солиб келаётгани»ни таъкидлайди.

Соҳибқирон борасида айтилган бу гаплар тўғри. Аммо Ислом Каримов қурдирган бирорта бино бугун жаҳонни ҳайратга солаётганини ҳали эшитганимиз йўқ.

Ўзбек ёзувчиларининг серкаси муваққат ва афтидан бўлажак президентга пахта қўйишни ҳам эсдан чиқармайди.

Бош вазирнинг ватинчалик президентликка тасдиқланиши ҳақида фикр юритар экан, Муҳаммад Али «ҳар бир ватандошимиз халқимиз, давлатимиз тақдири ишончли қўлларда эканига ишонч ҳосил қилгани»ни таъкидлайди.

«Ҳа, Ўзбекистоннинг биринчи президенти Ислом Каримов бошлаган ишлар асло тўхтамайди. Улуғ йўл давом этади!» дея хулоса қилади муаллиф.

Умуман, Муҳаммад Али бу гаплари билан Ислом Каримовни Амир Темур даражасига олиб чиқишни кўзлаганми ёки соҳибқиронни марҳум президент даражасига тушириб қўйишни ният қилганми, мақоладан англаш мушкул.

Баҳодир Шариф
Ўзбекистонлик газетхон таҳаллуси
Eltuz.com

Тағин ўқинг
14 сентябр 2017
Ўзбекистон телевидениесида эфирга узатилган «Отиннинг сўнгги «ови» кўрсатуви ижтимоий тармоқларда қизғин мунозараларга сабаб бўлмоқда. Кўрсатувда бир гуруҳ аёллар «ноқонуний ...
26 сентябр 2016
Олий Мажлис палаталарининг қўшма қарори билан амалдаги бош вазир, мустақил кузатувчилар фикрича, ноқонуний тарзда президент вазифасини бажарувчи этиб тайинланишини ...
1 август 2016
Эски ТошМИнинг Николай ғиштдан қурилган ва Ўзбекистон тарихий ëдгорликлар идораси муҳофазасида бўлган биноси Бош вазирнинг бир имоси билан бузилди. ...
29 апрел 2017
Ўзининг икки саҳифасини тўлиқ тез ёрдам хизмати фаолиятига бағишлаган “Оила ва жамият” газетаси (26.04) тиббиёт тизимидаги жиддий бир муаммони ...
Блоглар
21 сентябр 2017
Бўлмади. Кўпчилик зиёлиларнинг кутгани бўлмади. Ўзини 26 йилдан буён мустақил деб биладиган, кўксига уриб бу ...
18 сентябр 2017
Мамлакатимизда ўзгаришлар бошлангандан сўнг матбуотда «нима қилсак мамлакатимиз юксалади» мазмунидаги кўплаб мақолалар чоп этилди, этилмоқда. ...
18 сентябр 2017
Шавкат Мирзиёев Нью-Йоркдаги БМТ Бош Ассамблеясининг 72-сессияси доирасида 19-25 сентябрда ўтадиган олий сиёсий музокараларида маъруза ...