Мамлакат бирлиги ва бўлинмаслиги масаласида барчани ҳамжиҳатликка чақирамиз

Нукусдаги норози гуруҳ кўчага одам олиб чиқишга муваффақ бўлди. Буни 1 июль куни телеграм саҳифасида бир қадар ëритдик. Элтуз ўзини Нукусдаги норози группа матбуот котиби деб атаган шахс билан алоқада. Аммо норозилар гуруҳининг бу чиқиши бутун Қорақалпоғистон сиëсий иродасини билдирмайди.

Амударë, Тўрткўл, Беруний, Эллиққала ва Хўжайлидаги одамлар билан гаплашдим. Улар низо чиқишини истамасликларини очиқ айтишди. Аснода Ўзбекистондаги сепаратизмни қўлловчи бошқа гуруҳлар овози ҳам чиқа бошлади. Бу жиддий сигнал. Азизлар, Ўзбекистонда сепаратизм билан боғлиқ низо гирдобига тушиш каби люксимиз йўқ бизларнинг.

Конституцияга ўзгартириш киритишида ҳуқуқий муаммо йўқ. Тўғри қадам бу. Унитар давлат таркибида яна бир суверен тузилма бўла олмайди. Шу кунларда ДАВЛАТ ўзининг давлат эканини кўрсатиши керак. Жиддийлик ва азму қарор – энг муҳим жиҳат. Ëн бериш ва эмоциялар асирига тушиш бундай пайтда тўғри келмайди. Шу билан бирга куч ишлатар тизимлар ўта эҳтиëткорлик билан ҳаракат қилиши ва куч қўллашдан иложи бор қадар тийилиши керак. Зотан ўзбеклар ва қорақалпоқлар орасида низо тарихи йўқ. Мамлакат бирлиги ва бўлинмаслиги масаласида барчани ҳамжиҳатликка чақирамиз.

Элтуз жамоаси