Zulfiqor Musoqov nimadan kuyinadi?

«Huquq olami»da gazetasida e'lon qilingan intervyusida taniqli rejissyor Zulfiqor Musoqov «o‘zbek kinosining, aniqrog‘i, «O‘zbekfilm»da ishlangan ko‘pgina asarlarning hozirgi ahvolini… oxirgi 15 yilda do‘pposlanaverib, gangitib qo‘yilgan bolaga» qiyoslaydi.

«Nima uchun yoshlarda o‘zbek kinosida katta hodisaga aylangan «Abu Rayhon Beruniy», «Toshkent – non shahri», «Sevgi mojarosi», «Nodirabegim», «Ulug‘bek yulduzi», «Furqat», «Abu Ali ibn Sino», «Sayyod qo‘ng‘irog‘i», «Uchrashuv va vidolashuvlar», «Oy borib, omon qayt» va shu kabi 50 ga yaqin kinoasarlarni tomosha qilish imkoniyati yo‘q», deb yozg‘iradi rejissyor.

«Nima uchun bu filmlarni tushunib bo‘lmas sabablar bilan teleekranda ko‘rsatishmaydi. Gohida hayron qolaman, milliy telekanallarimizda kinoni umuman tushunmaydigan odamlar saviyasi juda past, avvalo, badiiylik nuqtai nazaridan ancha qoloq filmlarni bir soat sun'iy ravishda muhokama qiladi», deya kuyinadi Z.Musoqov.

So‘nggi yillarda o‘zbek kinosi ancha tanqidlarga uchrayotgani sabablari to‘g‘risidagi savolga rejissyor quyidagicha javob qaytargan: «Faqat bir narsaning – kinoda ijodiy muhitning yo‘qolgani, badiiylik o‘lchovi, sifat pasayib ketganining sababini aytishim mumkin: kinoning atrofidagi, kinoga kirib qolgan diletantlar, yovuz niyatlilar».

Z.Musoqov «oxirgi15 yil ichida tomoshabinning saviyasi zo‘ravonlarcha pastga tushirib yuborilgani»dan afsus bildirgan.

Eltuz.com