O‘zbekistonda faqat ruxsat etilgan joylarni suratga olish mumkin

Prezident Mirziyoev chet ellik sayyohlarga mamlakat hududida fotosurat olishga ruxsat beruvchi qaror chiqardi.

6 fevral kuni imzolangan bu qarorga ko‘ra, sayyohlarga maxsus ro‘yxat bilan cheklangan ob'ektlardan tashqari joylarni suratga olish ruxsat etiladi.

Qarorda suratga olish taqiqlangan yoki maxsus ruxsat olinishi kerak bo‘lgan ob'ektlar ro‘yxati alohida ilova qilinishi aytiladi.

Kelasi oydan O‘zbekistonga xizmat safarini rejalagan yevropalik bir sayyoh «Eltuz» nashriga bu yuzadan jiddiy xavotirini bildirdi.

Gap shundaki, elchixona xodimi unga boradigan joylari soatma-soat aniq belgilangan yo‘l xaritasi tayyorlab bergan.

O‘zbekistonga safar vizasini tasdiqlatish uchun u boriladigan har bir hudud, har bir uchrashiladigan odam to‘g‘risida batafsil kelishib olishga uzoq vaqt sarflagan.

«Bu hujjat mening O‘zbekistonga safarim Shimoliy Koreyaga borish kabi og‘ir kechishini anglatadi», dedi u «Eltuz» nashriga.

Rassom Tuz,
Eltuz.com