Элтуз хабари ортидан «Фаренгофорте» спрейини сотиш тақиқланди

«Фаренгофорте» савдо бренди остида спрей доривор воситасини қадоқлаш жараёни акс этган видеонинг Элтуз телеграм каналида  чоп этилиши ортидан Соғлиқни сақлаш вазирлиги ҳузуридаги Фармацевтика маҳсулотлари хавфсизлиги маркази 27 феврал куни ҳолатга расмий муносабат билдирди.

Вазирлик доривор восита экани айтилаётган «Фаренгофорте» савдо номидаги маҳсулотнинг аслида дори воситаси сифатида давлат рўйхатидан ўтказилмагани ва тиббиёт амалиётида қўллаш учун рухсат берилмагани ҳақида огоҳлантирди.

Фармацевтика маҳсулотлари хавфсизлиги маркази «Дори воситалари ва фармацевтика фаолияти» тўғрисидаги қонуннинг 20-моддасига мувофиқ, сифатсиз, қалбакилаштирилган, Ўзбекистонда рўйхатдан ўтказилмаган дори воситаларини ва тиббий буюмларни, шунингдек, Ўзбекистонда рўйхатдан ўтказилган дори воситаларининг ғайриқонуний нусхаларини харид қилиш, чакана реализация қилиш ҳамда улардан фойдаланиш тақиқланишини эслатиб ўтди.

«Шу муносабат билан, Фармацевтика маҳсулотлари хавфсизлиги маркази Ўзбекистон ҳудудида дори воситалари ва тиббиёт буюмларининг чакана савдоси билан шуғулланувчи (идоравий мансублигидан, мулкчилик ва бошқарув шаклидан қатий назар) барча ташкилотлар ва юртдошларимизни огоҳликка чақириб, ‘Фаренгофорте’ маҳсулотини реализация қилмаслигини сўрайди», — дейилади марказ хабарида.

Элтуз бундан бир неча кун аввал, 23 феврал куни Ўзбекистонда чиқарилаётган Фаренгефорте дорисининг ҳеч қандай гигиена ва лаборатория қонун қоидаларига жавоб бермайдиган тарзда қадоқланаётгани акс этган видеони ўзининг телеграм каналида эълон қилган эди.

Орадан кўп ўтмай, Элтузга Фаренго Форте махсулоти ҳақидаги айни материал юзасидан таҳдидли эътироз билдирилди.

“Фаренго Форте давлатимиз назоратидан ўтган. Давлатимиз  Фаренго Форте махсулотини текшириб, эффектини кўриб Лицензия берган. Фаринго Форте махсулотининг ҳамма ҳужжатлари бор. Ҳар хил Фейк тарқатаётган одам эртага қонун олдида жавоб беради”, дея даҳанаки таҳдид қилинди.

Қадоқланиш жараёни акс этган видеони фейк дея атаган шикоят эгаси Элтузга афтидан қалбаки бўлган лицензия нусхасини ҳам жўнатди.

Лекин Элтуз материални олиб ташламади. Бугунга келиб эса, кўп йиллар давомида Ўзбекистон аҳолисига 3 хил кўринишдаги бу спрей чақалоқлар, болалар ва катталар учун ноқонуний тарзда тайёрланиб сотилиб келинаётгани аён бўлди.

Элтуз уйдаги гапни кўчага олиб чиқади. Каналимизга обуна бўлинг.