Turkiyada 644 nafar o‘zbekka ishlash huquqi berildi

Turkiyada ishlash borasida vazirlikka murojaat qilgan 46 ming chet elliklardan 38 ming kishinig iltimosi qondirildi.

Turkiya ish va ijtimoiy himoya vazirligi tarqatgan ma'lumotga ko‘ra, ish istagida ariza berganlar orasida Markaziy Osiyodan kelganlar ancha:

“2355 kishi Qirg‘izistondan, 2220 kishi Turkmanistondan va 644 kishi O‘zbekistondan.”

Eltuz.com muxbiriga ma'lum bo‘lishicha, Turkiyaga Qozog‘istondan ish so‘rab murojaat qilganlar deyarli yo‘q.

Rossiya, Qozog‘iston va Janubiy Koreya kabi mamlakatlarni to‘ldirgan o‘zbekistonlik mehnat muhojirlari bugungi kunda tirikchilik ilinjida Turkiya shaharlarini ham “ishg‘ol” qilmoqda.

O‘zbekistonliklar ko‘proq Istanbul, Antaliya, Izmir kabi yirik shaharlarda mehnat qilishi aytiladi.

Turkiyaning “Antaliya riverasi” nomi bilan mashhur dam olish maskanlari dengiz sohili bo‘ylab 550 kilometrga cho‘zilib ketgan.

Yozgi ta'tillar boshlanishi bilan Turkiyaning O‘rtaer dengizi qirg‘oqlari dam oluvchilar bilan to‘lib-toshadi.

Antaliya, ayniqsa, rossiyaliklarning eng sevimli dam olish maskanlaridandir.

Rus tilini biladigan o‘zbekistonliklar esa ularga xizmat ko‘rsatishda mahalliy turklarga eng mos keladigan xizmatchilar sirasiga kiradi.

Eltuz.com muxbirining o‘rganishicha, hozir Turkiyada ishlayotgan o‘zbekistonlik ko‘plab muhojirlar noqonuniy ishlamoqda.

Eltuz.com