Cатира
8 апрел 2019

“Ҳамкасблар”дан эҳтиёт бўлинг!

Сўнгги кунларда ўзбек журналистикаси ҳаётида иккита диққатга сазовор воқеа юз берди. ЎзТВ журналисти Мавжуда Мирзаева бу муассаса ҳақида танқидий фикрлар билдиргани учун раҳбариятнинг қатағонига учради. Кекса журналист Маҳмуд Саъдий эса “XXI аср” газетасида босилган мақоласи учун халқ таълими вазири томонидан судга тортилди.

Бу воқеалар ўзбек журналистикасининг икки юзини кўрсатиш асносида унинг ҳали ҳам қатъиятсиз эканини намойиш этди.

Мавжуда Мирзаевага ўз фикрларини билдириш учун минбар берган AzonTV онлайн телеканали бу иши сабаб O‘zbekiston24 телеканали раҳбариятидан узр сўради. Бунинг устига, унинг интервьюси эфирга узатилишига масъул бўлган ходимларига интизомий жазо берганини ҳам эълон қилди.

Яқиндагина ҳукумат амалдори Наргиза Раҳимова (Саидова)нинг “исломни ҳақорат қилгани учун узр сўраши”га имкон бериш мақсадида минбарини кўтариб чопган телеканал бошқа бир ҳамкасбининг фикрлари учун узр сўраб юрибди.

Худога шукур, Мавжуда Мирзаеванинг ҳимоя қилиб чиқаётганлар уни қоралаётганлардан кўпроқ экан.

Таниқли журналистларимиздан бири ўз ҳамкасби ҳимоясига чиқиб, ЎзТВ раҳбариятига: “Олдин Мавжудадан олган 3 минг долларни қайтариб беринглар, кейин сизлар билан бошқача гаплашамиз”, дея мушт кўрсатди ва “Ҳаммаларингнинг орқаларинг тоза эмас”, деганга ўхшаш дағдаға билан чиқди.

Бу ёқда кимсан вазир саксонни қоралаган журналистни жазолашга жаҳд қилиб ётибди.

Кўпчилик амалдор нишонига тушган журналистни ҳимоя қилиш ҳаракатига қўпган бир вақтда кутилмаган зарба яна ҳамкасбларидан келиб тушди.

Ўзбек сайтларидан бирида “Маҳмуд Саъдий билан турли йилларда бирга ишлаган “ҳамкасблари” номидан” унинг ўзи “одам эмаслиги” ҳақида мақола босилди.

Улар ҳозир гап Маҳмуд Саъдий шахси хусусида эмас, сўз эркинлиги ҳимояси ҳақида бораётганини ёки англамайди, ёки буни истамайди.

Айтмоқчимизки, Маҳмуд Саъдий шахс сифатида қандай одам бўлмасин, унинг айтган фикрлари йўқотган мавқеини эндигина тиклашган уринаётган ўзбек журналистикасининг мавжуд ҳокимият томон бир саси эди, ҳали халқнинг чинқириғига айланмаган бир сўзи.

Бу сасга жавобан амалдор томонида туриб қарсак чалаётган ўша “ҳамкасблар” ким экан? Ислом Каримов кийдирган жўбани ечишни истамаётганлар эмасмикин улар?!

“Ўзбекистонда мансабдор шахслар устидан истаганча иғво қилиш имконини берадиган қонун-қоида йўқ, улардан ўзини ҳимоя қилиш ҳуқуқи ҳам олиб ташланмаган”, дея иддао қилмоқда “ҳамкасблар”.

Аввало, “ҳамкасблар” ўз ҳимоясига олишга уринаётган вазир Шерзод Шерматов ҳозирги ҳукуматдаги журналистлар учун энг очиқ амалдорлардан бири бўлгани билан “тилло” бўлмаслиги мумкин-ку.

Қолаверса, хорижий сармоядорларни ярим миллион долларга туширган фирибгар тўда ишида ўша вақтда инновацион ривожланиш вазири ўринбосари бўлиб ишлаган бу амалдорнинг ҳам исми қалқиб чиқмоқда.

Бу иддаолар қанчалик тўғрилигига кафолат бермаймиз, аммо Ўзбекистоннинг коррупция рейтингидаги ўрни, шунча йиллардан буён урчиб келган қонунсизлик тенденциялари, адолатсизликдан ҳайқираётган халқ нидолари кўп нарсалардан дарак беради.  

Айтмоқчи бўлганимиз, ўзбек журналистикаси энди-энди сал-пал қаддини кўтармоқда. Амалдорлар эса осонликча бунга имкон бермайди. Чунки имкон берган сари уларнинг орқаси очилиб бораверади.

Шундай экан, айни пайтда журналистларнинг касбий бирдамлиги биринчи ўринда турмоғи керак. Ҳокимият вакиллари эса ҳар доим ўзини ҳимоя қилиш йўлини излаб топиш қудратига эга.

Баҳодир Шариф
Eltuz.com

Тағин ўқинг
14 июл 2016
“Правда востока” газетаси Вьетнам Социалистик Республикасининг Ўзбекистондаги элчиси байрам муносабати билан “Жаҳон” ахборот агентлигига берган интервьюсини эълон қилди. “Ўзбекистон ...
28 феврал 2018
Ўзбекистон Миллий хавфсизлик хизмати собиқ раиси, қўли узун Рустам Иноятовнинг ўғлига тегишли кўчмас мулклар ҳақида Open Source Investigations (OSI) ...
8 сентябр 2015
Бугун немислар очиқ қалблар билан қочқинларни кутиб олишмоқда. “Берлинда мен Refugers welcome – Қочқинлар хуш келибсиз! деган шиорларни кўраман. ...
1 июн 2017
30 май куни ижтимоий тармоқда президент Мирзиёевнинг банкирларни кескин танқид қилгани аудиоси пайдо бўлди. Видеоселектрдан ёзиб олинган аудиода президент ...
Блоглар
25 май 2020
“Би-Би-Си” радиоси ўзбек хизмати журналисти Муҳаммад Солиҳга: “Коронавирус пандемияси пайти шундай чиқиш қилишингиз ўринлими? Бунинг ...
18 май 2020
1914 йилнинг 18 майи дея тарих ëзилган бу сурат марказида турган Абдуллабекнинг эвараси, шу кунларда ...
16 май 2020
Ўзбекистондаги, Қозоғистондаги, Болтиқбўйидаги рус тилли зиёлилар ва фуқаролар қанчалар ақлли, асосли аргумент келтирмасин, қанчалик дўстона ...