Вазирликдаги Рустамнинг «ишқи» достон бўлди

Халқаро журналист «Агнешкахон воқеаси» кўп саволларга жавобларни очиб берди. Келинглар, жонажон аккредитациядан бошлаймиз. Айнан уларни назорат қиладиган институтнинг ўзи йўқ, жавобгарликнинг ўзи йўқ, менимча. Бўлмаса, 2 ойда берилиши керак бўлган жавоб 6 ойдан кейин бемалол берилмасди.

Давлат ташкилотларида назорат йўқлиги ўзбошимчаликка олиб келган доим. Ўзи аккредитация нега бунча муддатда берилиши керак?

Балки янги Ўзбекистонда «ташқи ёвуз, қора кучлар» фаразимиздан воз кечармиз? Қачонгача сунъий душманлар билан яшаймиз? Эски даврдан қолган «тешик тоғоралар»дан қачон қутуламиз?

«Вазирликда шундай «суюқларимиз» бор экан, билмай юрган эканмиз«

Ҳозирги ҳолатдан келиб чиқсак, вазият шу даражадаки, бу худди ўзимиздаги айрим «ҳолат»ларни ҳам эслатади. Яъни сенинг қўлингда бирор «ричаг» бўлади. Бу «ричаг»дан манфаатдор аёл сенга «интим хизмат» қилиши керак. Шундан сўнг сен тегишли «кнопка»ни босасан. Мақсад – нафсни қондириш.

Элнинг оғзига элак тутиб бўлмайди. «Маънавият» ғумбакларига яширинган айрим ҳокимлар, айрим мактаб директорлари, айрим боғча мудиралари ва бошқалар бунга мисол бўла олади. Майли, тўлиқ ошкор қилмай. Боғишамол тарафларга бир ўтгум бор. Тушунган тушунди, хуллас.

ТИВ ходимига эса тезкор хизмат текшируви керак. Бу ҳолат ташқи, ҳаммага кулиб турадиган юзимизга катта салбий таъсир ўтказиши аниқ. Учинчи – энг асосийси, ҳали ҳам бизда ОАВнинг асл мақсади нима экани, нега бир вақтлар учинчи ҳокимият унга эҳтиёж сезгани учун пайдо бўлганини тушунмайдиганлар кўп.

Aфсуски, давлат идораларида бундайлар талайгина. Эски давр мероси шу бўлса керак. Қутула олмаяпмиз. Кичик ишларини ҳам ҳамма кўришини истайдиган амалдорларга тўла бизнинг идоралар. Яна қарсак чалмаслик керак, дейдиганларнинг ўзи ҳар гапида қарсакка ишора қилиб «пауза» сақлайди. Хуллас, от изи ит изига аралашиб кетган. Ҳамма нарса ғалатисифат.

Зафарбек Солижонов
журналист