Mirziyoev oddiy ayolni doktorga aylantiradigan alkimyogar

Dissertatsiya qo‘lyozmasi toshqinda yaroqsiz holga kelganini iddao qilgan 28 yashar sirdaryolik Kamola Abrorxonovaga prezident topshirig‘i bilan doktorlik darajasi berildi.

Mahalliy nashrlarga ko‘ra, 15 may kuni mirzaobodliklar bilan uchrashuvidan keyin prezident Mirziyoev istisno tariqasida ayolga doktorlik darajasini berishni buyurgan.

Shundan keyin Abrorxonova Guliston shahrida tashkil etilgan tantanali tadbirda doktorlik ilmiy daraja diplomini Oliy attestatsiya komissiyasi raisi Ahmedbek Yusupovdan qabul qilib olgan.

«Shvetsiya qiroli falonchiga Nobel mukofoti ber, deb amr qila oladimi?

Ëki AQSh prezidenti kinoakademiyaga telefon qilib, pistiyonchiga Oskar ber, deb ayta oladimi? Germaniya kantsleri Merkel Fanlar akademiyasi rahbarini yoniga chaqirib, mana shu olimga doktorlik unvoni ber, deya oladimi?

Yo‘q, albatta. Agar shunday bo‘lsa, osmon uzilib yerga tushgan bo‘lardi.

Italiyada diktator bo‘lgan Mussolinining ham jur'ati etmagan bunga.

Masalan, bitta olim borib: “Mussolini tog‘a, doktorlik ishimni echki yeb qo‘ydi, shu palakatni hisobga olib ilmiy unvon bering” desa, Mussolini bu betamiz olimga “qayta yoz!” derdi.

Ammo O‘zbekiston prezidenti ilmiy yozmalari toshqinda yaroqsiz holga kelgan sirdaryolik xotinga doktorlik darajasi ber, deb Fanlar akademiyasiga buyurdi.

Fanlar akademiyasidagi qullar esa o‘z xo‘jayini amrini shessekundda bajo keltirdi. Bonusiga professor degan unvonni ham qo‘shib berishsa kerak.

21-asrda o‘zbek olimining g‘oz pati yoki qamish qalam bilan ilmiy ish yozishining o‘zi mo‘'jiza. Men bilgan G‘arb olimlari o‘z ilmiy ishini kompyuterda yozadi. Kompyuterni qo‘chqor suzsa, qo‘tos ezg‘ilasa yoki hojatxonaga tushib ketsa, fayllar bulutlarda saqlanadi», dedi bu haqda «Eltuz» kanalidagi ma'ruzasida rassom Tuz.

Eltuz.com